Жывапіс. Родзін Алесь

Альбом самага берлінскага беларускага мастака Алеся Родзіна. Свой творчы шлях мастак пачаў яшчэ ў 70-х. Творам Родзіна ўласціва шматпланавае адлюстраванне бязмежнай прасторы, у якой паралельна адбываюцца працэсы геалагічныя, тэхнакратычныя, біялагічныя, футуралагічныя.

Мастацтва Алеся Родзіна – з’ява зусім нечаканая для беларускага жывапісу з яго ідэалагічнымі табу і агульнапрынятымі нормамі. Ён пачаў выказваць свае неардынарныя погляды на свет з першых выставачных праектаў 1970-х гг. Яго працы не сустрэлі паразумення. Падаваліся празмерна складанымі, неадназначнымі. У той час Беларусь была цалкам ізаляваная ад еўрапейскіх мастацкіх навацыяў, а тым больш ад амерыканскага поп-артычнага і канцэптуальнага трыумфу. Рэтрарэалізм быў падаўляльным метадам эстэтычнага бачання свету. Мастак інтуітыўна адчуваў, што трэба пераадольваць гэты штучны бар’ер, і знайшоў для гэтага свой асабісты творчы метад: “нон-стоп-панарама”, што адпавядае назве адной з яго вялікіх карцін. Жывапісная кампазіцыя будуецца на разнапланавым адлюстраванні бязмежнай прасторы, у якой адначасова адбываюцца працэсы урбаністычныя, геалагічныя, тэхналагічныя, біялагічныя і г. д. Каб звесці іх у адзіную вобразную сістэму, мастак абірае высокі, панарамны пункт гледзішча і выкарыстоўвае амаль манахромныя колеры ў рознай танальнасці.

28 с.

ISBN 978-985-6906-11-7