Часопіс Дзеяслоў №5 (102) — 2019

У гэтым нумары “Дзеяслова” – цэлае суквецце значных і знакавых для беларускай літаратуры аўтараў. Толькі пералік некаторых з іх дазваляе казаць пра 102-гі нумар як узорна-“зорны”. Мяркуйце самі: Валянцін Акудовіч, Уладзімер Арлоў, Алена Брава, Валеры Гапееў, Адам Глобус, Васіль Жуковіч, Алесь Разанаў, Сяргей Рублеўскі, Андрэй Хадановіч, Антаніна Хатэнка, Віктар Ярац…

У празаічнай частцы, напэўна, найбольшай увагі заслугоўвае раман Андрэя Федарэнкі “Жэтон на метро” (другая частка твора мае выйсці ў наступным нумары “Дзеяслова”).

З галоўных цікавостак архіўнай часткі нумара – публікацыя ананімнай паэмы ХІХ ст. Як піша ў грунтоўнай прадмове Юры Пацюпа, “паэма «Чортава сіла» вядомая даўно і не раз была знойдзеная, а потым не раз забытая зноў, толькі вось ніводнага разу ёй не пашчасціла (калі не лічыць некалькіх урыўкаў) патрапіць у друк”. Здзейснілася гэта дзякуючы высілкам Юрыя Пацюпы і Вячаслава Мартысюка, а таксама – Тацяны Зямсковай, якая паспрыяла ў капіяванні паэмы праз Рускае геаграфічнае таварыства.

278 с.

ISSN 2076-1309